Forbes Спорт нашри ЖЧ—2026 турнирида иштирок этадиган ҳар бир терма жамоанинг энг кўп даромад топувчи футболчилари рейтингини эълон қилди. Эътиборлиси, ушбу рўйхатдан Ўзбекистон миллий терма жамоаси ҳимоячиси Абдуқодир Ҳусанов ҳам жой олди.

Нашр таҳлилларига кўра, Ҳусанов Ўзбекистон терма жамоасининг энг сердаромад ўйинчиси ҳисобланади. Forbes’нинг қайд этишича, ёш ҳимоячининг молиявий барқарорлиги нафақат футбол майдонидаги шартномалари, балки бизнесдаги фаоллиги билан ҳам боғлиқ.

Ушбу рейтинг футболчиларнинг йиллик умумий даромади асосида тузилган бўлиб, унда ўйинчиларнинг клубдаги маоши, бонуслари, ҳомийлик шартномалари, лицензия тўловлари, реклама келишувлари ҳамда шахсий бизнесдан келадиган даромадлари ҳисобга олинган.

Ҳисоб-китоблар Capology, Football Бенчмарк ва Спотраc платформалари маълумотларига таяниб, солиқлар ва агентлик комиссияларисиз акс эттирилган. Унга кўра, ўзбекистонлик ҳимоячининг йиллик даромади қуйидагича кўриниш олган:

Футболдан оладиган даромади: 5 миллион АҚШ доллари;
Футболдан ташқари (тижорий) даромадлари: 1,2 миллион АҚШ доллари;
Умумий йиллик даромади: 6,2 миллион АҚШ доллари.

Рейтингнинг кучли учлигини эса кутилганидек жаҳон футболи афсоналари — Криштиану Роналду, Лионель Месси ҳамда франциялик ҳужумчи Килиан Мбаппе банд этди.

Жаҳоннинг энг сердаромад футболчилари ТОП-10 лиги:

1. Криштиану Роналду (Португалия);
2. Лионель Месси (Аргентина);
3. Килиан Мбаппе (Франция);
4. Эрлинг Ҳоланд (Норвегия);
5. Риёд Маҳрез (Жазоир);
6. Винисиус Жуниор (Бразилия);
7. Муҳаммад Салоҳ (Миср);
8. Садио Мане (Сенегал);
9. Жамол Мусиала (Германия);
10. Жуд Беллингем (Англия).